Txirrindularitza

Txirrindularitza
2015-11-20 10:22:38
OÑATI IRRATIAN ELKARRIZKETATU ZUTEN ASTEAZKENEAN
Jon Odriozola: «Ikurrina, Pirinioetara itzuli behar dugu»

Duela hamar egun jakinarazi zen Kontinental mailako Murias txirrindulari taldeak, Eusko Jaurlaritzaren babesa izango duela denboraldi berri honetarako. Aurrerantzean, «Euskadi Basque Country - Murias Taldea» izango da Jon Odriozola buru duen proiektuaren izen berria. Zuzendari txantxikuarrak akordio berri honen gaineko xehetasun ugari eman zituen asteazkenean, Oñati Irratian eskaini zuen elkarrizketa mamitsuan.

 

Murias txirrindulari taldeak maila berean jarraituko du datorren denboraldian, baina Euskal txirrindulari eta zaleak batu nahi dituen ekimenak, aurrerapauso sendo bat eman du etorkizunera begira. Eusko Jaurlaritzak bat egingo du proiektuarekin eta urtarrilean hasiko den ikasturte berrian, Euskadi Basque Country - Murias Taldea izango da. «Nire ametsaren zati handi bat bete dela onartu beharra daukat» esanez hasi zuen Oñati Irratiko elkarrizketa Odriozolak. «Kosta zaigu gure proiektu honen helburua zein den jendeari ikusaraztea, baina akordio berri honi esker, Euskadi markaren enbaxadore izango gara leku guztietan; aurrerapauso handia da» zioen.

 

Odriozolaren ustez, beste kiroletan edo gizarteko beste hainbat sektoretan ezinezkoa den batasuna ekarri nahi du proiektu berriak. «Talde hau euskaldun guztiena izango da eta hori futbolean adibidez ezinezkoa da Euskal Herrian talde bat baino gehiago ditugu eta. Euskaldunak, gure nortasuna eta herri honek daukan batasuna mundura zabaldu nahi dugu». Helburuak handiak badira ere, lanean gogor jarraitu beharra dagoela onartu zuen: «Hankak beti lurrean izan behar ditugu baina ametsak bilatu eta landu egin behar dira. Eta nik uste bide onetik goazela» zioen.

 

Lehen urtea oso positiboa

Zuzendari oñatiarrak, proiektu berriaren lehen denboraldia aztertzeko parada ere izan zuen elkarrizketan. «Azken orduan eta prisaka sortu ginela kontutan hartuta, oso harro nago egin dugunarekin. Mundu mailako talde eta ziklista onenen aurka aritu gara lasterketa askotan eta beti eman dugu aurpegia». Urteko momentu onena proiektua errepidean jartzea izan zela onartu zuen Jonek.

 

Hala ere, denboraldi erdian, momentu gogorrak ere bizi izan zituztela jakinarazi zuen: «Urte erdian edo jarraitzeak merezi ote zuen zalantzan jarri nuen. Sekulako lana egiten ari ginen eta orokorrean gure proiektuaren funtsa zein zen ba ote zekiten galdetzen nion nire buruari». Hala ere zorionez, egoera aldatu, eta oso sentsazio onekin amaitu du denboraldia Jonek. «Kosta zaigu, baina azkenean, jendeak ulertu du zein den gure nahia. ProTour mailako zuzendari eta ziklista ugarik errekonozitu gaituzte, eta orain, Eusko Jaurlaritzak gurekin bat egin izana da jaso genezaken errekonozimendurik onena».

 

Atsedenerako astirik ez

Txirrindulariak aurredenboraldiko lanak egiten ari dira uneotan eta aurrez, opor egun batzuk ere izan dituzte. Odriozolaren kasua baina, guztiz bestelakoa da. Jai egunik ez, eta lanez gainezka ibili dela onartu zuen elkarrizketan. «Egun pare batean mendira joan nahiz onddoak hartzera, hori izan da aurtengo nire oporraldia» zioen irrifartsu. Hala ere, txantxikuarra jakitun da proiektuko zuzendari nagusia izanik, era honetako lanak egitea egokituko zitzaiola. Baina aurrerantzean, bulegoko lanak alde batera utzi eta kirol arloan zentratu nahiko lukeela adierazi zuen. «Orain arte dena egitea tokatu zait, baina nik uste proiektua sendotzen doan heinean, nire lana kirol alderdia kudeatzea dela eta beste lanak, taldeko beste departamentu batzuetan jorratu beharko dira».

 

Datorren denboraldian, berriz ere, kategoria Kontinentalean lehiatuko da taldea, eta euskal txirrindulari bikainekin indartu dute taldea. «Aitor Gonzalez, Mikel Iturria, Alex Aranburu, Gotzon Udondo eta Pello Olaberria izango dira gure aurpegi berriak eta guztiak oso denboraldi ona egitetik datoz». Proiektuan jarraituko ez duten ziklistei berriz, eskerrak eman nahi izan zizkien Odriozolak. «Pena da txirrindulari batzuk agurtu beharra izatea, baina hau da kirolaren legea. Hala ere guztiei eskerrak eman nahi dizkiet erakutsi duten profesionaltasunagaitik eta etorkizunean zorterik onena opa diet» zioen. 14 txirrindularik osatuko dute aurtengo plantilla berria.

 

Egutegia indartu eta Itzulia borrokatu

Egutegiari dagokionez, 2015ean egin zuten egutegi kontinental profesionala indartzea dute helburu. Esate baterako atzerriko HC mailako hainbat lasterketetan ariko dira: Nazioarteko Kriteriumean, Frantziako Paris-Tours lasterketan, Bretainia Handiko Itzulian edota Norvegiara Itzulian. Horiek seguruak dira baina, Odriozolak taldea Euskal Herriko Itzulian ikusi nahi du. «Iaz ez genuen lortu eta aurten berriz ere saiatuko gara. Lege aldetik ezin dugu txapelketa honetan lehiatu baina UCIk nor garen eta zer nahi dugun ulertzen badu, legeak salbuespen asko ditu. Gure asmoa Eusko Jaurlaritzarekin batera proposamen sendo bat aurkeztea izango da eta nik uste, aukerak izango ditugula gure lasterketan lehiatu ahal izateko» adierazi zuen.

 

Etorkizunera begira

Asteazkeneko elkarrizketan garbi gelditu zen, Euskadi Basque Country - Murias txirrindulari talde bat baino gehiago dela. «Hemen Euskaldunon etorkizuna dago jokuan eta guztiok elkartzen bagara, proiektu honek epe motzean urrats asko emango ditu» zioen. 2017 urterako adibidez, kategoria Kontinental profesionalerako jauzia ematea da asmoa, eta, besteak beste, Euskal Herriko Itzulian, Donostiako Klasikan, Espainiara Itzulian eta Volta Catalunyan parte hartzeko aukera izatea.

 

Epe motzera begira berriz, 2018ko Frantziako Tourrean lehiatzeko gonbita lortu nahi du Euskadi Basque Country - Murias taldeak, euskal txirrindularitza berriz ziklismo profesionalaren elitean kokatzeko. «Euskaldunak eta ikurrina, Pirinioetara itzuli behar dira. Euskaltel desagertu zenetik munduko zale onenaren bultzada asko jaitsi da eta gure lana, talde honekin nortasun hori berriz ere errekuperatzea izango da» esanez agurtu zen Odriozola.

 

Jon Odriozolak Oñati Irratian eskaini zuen elkarrizketa guztia entzun nahi izatera, sakatu beheko podcastean:

 

Odriozola, aginduak Murias taldeko ziklistekin. Argazkia: Murias Team.

iritziak

agenda

Bilera irekia
18.05.03
Pilota
Aloña Mendi taberna

iritzia

Uda honetan, baita ere, mugitu ala hil
Iñigo Murgiondo
2017-06-26
hileko bideoa

publizitatea

Facebook
Twitter
Tweets por el @OKMagazinea.